ਮੈਨੂੰ ਰਤਾ ਨਾ ਭਾਇਆ , ਤੇਰੇ ਬਗ਼ੈਰ ਸਾਵਣ ।
ਪਤਝੜ ਜਿਹਾ ਮਨਾਇਆ , ਤੇਰੇ ਬਗ਼ੈਰ ਸਾਵਣ ।
ਤੇਰੇ ਬਿਨਾ ਕੀ ਸਾਵਣ , ਸਾਵਣ ਹੈ ਤੂੰ ਮੇਰਾ ,
ਰੋ – ਰੋ ਅਸਾਂ ਲੰਘਾਇਆ , ਤੇਰੇ ਬਗ਼ੈਰ ਸਾਵਣ ।
ਤੂੰ ਕੋਲ ਸੈਂ ਤਾਂ ਸਾਵਣ , ਲਗਦਾ ਸੀ ਅਪਣਾ-ਅਪਣਾ ,
ਸੌਂਕਣ ਦੇ ਵਾਂਗ ਆਇਆ , ਤੇਰੇ ਬਗ਼ੈਰ ਸਾਵਣ ।
ਕਹਿੰਦਾ ਸੈਂ ਤੂੰ, ਮੈਂ ਆਉਣੈ , ਸਾਵਣ ਤੋਂ ਆਊ ਪਹਿਲਾਂ ,
ਰਾਹ ਤੱਕਦੀ ਲੰਘਾਇਆ , ਤੇਰੇ ਬਗ਼ੈਰ ਸਾਵਣ ।
ਨਾ ਮਾਲ੍ਹ ਪੂੜੇ ਖਾਧੇ , ਪਿਪਲੀ ਨਾ ਪੀਂਘ ਪਾਈ ,
ਏਦਾਂ ਅਸਾਂ ਗਵਾਇਆ , ਤੇਰੇ ਬਗ਼ੈਰ ਸਾਵਣ ।
ਨਾ ਮਾਹੀ ਸੀਨੇ ਲਾਇਆ , ਨਾ ਦੁੱਖ ਸੁਖ ਹੀ ਕੀਤਾ ,
ਮੇਰੇ ਲਈ ਨਾ ਆਇਆ , ਤੇਰੇ ਬਗ਼ੈਰ ਸਾਵਣ।
ਖ਼ੁਸ਼ ਹੋਣਗੇ ਉਹ ‘ਦਰਦੀ’ , ਜਿਹਨਾਂ ਦੇ ਕੋਲ ਮਹਿਰਮ ,
ਗ਼ਮ ਵਾਂਗ ਮੈਂ ਹੰਢਾਇਆ , ਤੇਰੇ ਬਗ਼ੈਰ ਸਾਵਣ ।
ਸਰਬਜੀਤ ਦਰਦੀ
ਮੋ : 9914984222
ਬਹੁਤ ਵਧੀਆ ਉਪਰਾਲਾ ਹੈ ਜੀ। ਆਪ ਜੀ ਵਧਾਈ ਦੇ ਪਾਤਰ ਹੋ । ਮੈ ਵੀ ਇਸਦਾ ਹਿੱਸਾ ਬਣ ਕੇ ਮਾਣ ਮਹਿਸੂਸ ਕਰਾਂਗਾ।
ਜੀ ਵੀਰ ਜੀ। ਤੁਹਾਡਾ ਬਹੁਤ ਬਹੁਤ ਧੰਨਵਾਦ।
ਸਾਨੂੰ ਬਹੁਤ ਖੁਸ਼ੀ ਹੋਵੇਗੀ।