ਤੂੰ ਚਾਹੇ ਭੁੱਲ ਗਿਐਂ ਯਾਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਤੂੰ ਜਾਨੋਂ ਵੱਧ ਸੀ ਪਿਆਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਤੂੰ ਕਿਹੜੇ ਅੰਬਰੀਂ ਛੁਪਿਐਂ , ਤੂੰ ਕਿਸ ਧਰਤੀ ਚ ਜਾ ਲੁਕਿਐਂ ,
ਕਦੇ ਮਿਲਿਆ ਨਾ ਤੂੰ ਯਾਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਤੂੰ ਮੇਰੀ ਜਾਨ ਲੈ ਲੈਂਦਾ , ਤੇਰੇ ਵਿਚ ਜਾਨ ਸੀ ਮੇਰੀ ,
ਤੇਰੇ ਬਿਨ ਮਰ ਰਿਹਾ ਯਾਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਮੁਹੱਬਤ ਕਰਨੀ ਸੌਖੀ ਹੈ , ਨਿਭਾਉਣੀ ਬਹੁਤ ਔਖੀ ਹੈ ,
ਤੂੰ ਤੁਰਿਆ ਅਧ ਚ ਛਡ ਯਾਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਤੂੰ ਹੁਣ ਕਿਉਂ ਛੱਡਣਾ ਚਾਹੁੰਨੈਂਂ , ਤੂੰ ਹੁਣ ਕਿਉਂ ਭੁੱਲਣਾ ਚਾਹੁਨੈਂ ,
ਕਦੇ ਕਹਿੰਦਾ ਸੀ ਇੰਜ ਯਾਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਹਰਿਕ ਪਲ਼ ਯਾਦ ਕੀਤਾ ਮੈਂ , ਧਿਆਇਆ ਰੱਬ ਦੇ ਵਾਂਗਰ ,
ਪਰਾਇਆ ਹੋ ਗਿਆਂ ਯਾਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਤੇਰੇ ਮਗਰੋਂ ਬਣਾਇਆ ਮੈਂ ਨਹੀਂ ਕੋਈ ਨਵਾਂ ਸਾਥੀ ,
ਤੂੰ ਮੇਰੀ ਜਾਨ ਸੀ ਯਾਰਾ , ਤੇਰਾ ਚੇਤਾ ਬੜਾ ਆਉਂਦੈ ।
ਸਰਬਜੀਤ ਦਰਦੀ
ਮੋ : 9914984222